देवी जोगण चाळकनेच जयो

देवी जोगण चाळकनेच जयो

दोहा

चाळराय रै चाळरी, झाली सेवक झंब

वळियो दिन टळिया विघन, आंगण फळियो अंब।

दे झंझेड़ी रोग दुख, पग बेड़ी खळ पेच

तूं बालक तेड़ी तठै, नेड़ी चाळकनेच।

छन्द रोमकंध

सुभ भाळक दीठ संभाळक सेवग, झाळ बंबाळक रोस झडै़

विकराळक सींह चढै विरदाळक खेतरपाळक अग्र खड़ै

चक्ख नक्ख सरूप रचै चिरताळक दाणव गाळक संभू दयो

प्रतपाळक बाळक रोग प्रजाळक जोगण चाळकनेच जयो

                      देवी जोगण चाळकनेच जयो।1।

रण ताळक झाळ सत्रां सिर राळक के महीपाळक सेव करै

चमराळक सीस ढुळाळक चैसठ, तेज उजाळक भांण तरै

अकराळक घाट धताळक ओपत,थाट थटाळक आण थयो

प्रतपाळक बाळक रोग प्रजाळक, जोगण चाळकनेच जयो

                         देवी जोगण चाळकनेच जयो।2।

भळळक्क त्रिसूल बणे अंग भूसण, कोर जरी पळळक्क कियै

नचतां खळळक्क पगां बज नेवर, हार नगां हळळक्क हियै

मुळळक्क पहेपक फूह झड़े, मुख तेज रवी भळळक्क तयो

प्रतपाळक बाळक रोग प्रजाळक, जोगण चाळकनेच जयो

                            देवी जोगण चाळकनेच जयो। 3।

चट पट्ट निपट्ट झटोपट चोसठ, नाच अघट्ट अमट्ट नचै

अट पट्ट मुगट्ट धरै सिर ऊपर, रास सुभट्ट प्रगट्ट रचै

झंणणट्ट सुघट्ट वजे पग झांझर, थाट थडां संणणट्ट थयो

प्रतपाळक बाळक रोग प्रजाळक, जोगण चाळकनेच जयो

                            देवी जोगण चाळकनेच जयो। 4।

धम धम बजै घम घंम नचै धर, नेवर पै ठम ठंम नदंा

नम नम्म भवनींय चामुण्ड नाचत, व्है डमरू डमडंम हदां

चम चम्म आभूषण अंग चमंकत, भाण उदेगिर बीच भयो

प्रतपाळक बाळक रोग प्रजाळक, जोगण चाळकनेच जयो

                         देवी जोगण चाळकनेच जयो। 5।

नमकै घमकै ठमकै पग नूपर, चूड़ भुजां दमकै चमकै

क्रमकै दहूं कुंडळ कांनन का, छत्र छागळीया रंकमे छंमकै

समकन्त सिन्दूर री रेख संवारत, भाळमकै अभकै भरियो

प्रतपाळक बाळक रोग प्रजाळक, जोगण चाळकनेच जयो

                         देवी जोगण चाळकनेच जयो। 6।

चलती ललकार हिलोमिल चैसठ, हाक भैरूं हलकार हसै

नचती भळकार वळो वळ नाचत, लाल चुड़ी भळकार लसै

तिलकां भळकार करै पलकां तिक, प्रेत मुखां बलकार पयो

प्रतपाळक बाळक रोग प्रजाळक, जोगण चाळकनेच जयो

                         देवी जोगण चाळकनेच जयो। 7।

चंड मुंड घुमंड बिहंडक चामण्ड, नव खंड अरू ब्रहमंड नमै

प्रचंड हुडंड भूडंड प्रखंडज, रूंड दुरंड अखंड रमै

झुण्ड जोगण थुण्ड उभंड झटोझट, खण्ड नवंृ चण्ड खेह खयो

प्रतपाळक बाळक रोग प्रजाळक, जोगण चाळकनेच जयो

                         देवी जोगण चाळकनेच जयो। 8।

खळ थोगण स्रोण अरोगण खप्पर, छेड़त जोगण जोस छिले

मद भोगण मांस आरोगण मैमंत, घाव त्रमोगण दैत घिले

अंग रोगण मेट ढके पर ओगण, क्रीत अमोगण रीत कयो

प्रतपाळक बाळक रोग प्रजाळक, जोगण चाळकनेच जयो

                         देवी जोगण चाळकनेच जयो। 9।

वजि डाक त्रंबाक धमांक वळोवळ, हाक चंडी नव लाख हमैं

पडि़ धाक नरां चाक प्रथी, नर नाग सुरां असुरांक नमैं

मद छाक अैराक पीयाक हमेसज, ले बकराक चढाक लियो

प्रतपाळक बाळक रोग प्रजाळक, जोगण चाळकनेच जयो

                         देवी जोगण चाळकनेच जयो। 10।

झणणाट बजै रमतां पग झांझर, व्योम डंका बणणाट बजै

खपरां खणणाट हुवै रत खावण, छोळ रत्रां छणणाट छजै

नचतां झणणाट पगां वज नेवर, छत्र छटा छणणाट छयो

प्रतपाळक बाळक रोग प्रजाळक, जोगण चाळकनेच जयो

                         देवी जोगण चाळकनेच जयो। 11।

ब्रहमांणीय रांणीय बेद बखाणींय, जांणीय मांणीय चार जुगां

असुरांणीय घांणीय मार उडाणींय, खांणीय बांणीय झाल खगां

सगतांणीय होय ब्रह्मणीय साथे, नाच नचांणीय घाट नयो

प्रतपाळक बाळक रोग प्रजाळक, जोगण चाळकनेच जयो

                         देवी जोगण चाळकनेच जयो। 12।

चाळराय सिहाय बधाय सुचारण, गाय बजाय रीझाय गुणां

सुरराय नमों मंहमाय सुरांपत, खाय खळां खपवाय खणां

गढ़ गाम दिराय चढ़ाय गजां, पर आद भवांनीय सहाय अयो

प्रतपाळक बाळक रोग प्रजाळक, जोगण चाळकनेच जयो

                         देवी जोगण चाळकनेच जयो। 13।

बुधवांन समांन ब्रवांन बळोबळ, थांन सुथांन अमांन थप्यो

असुरांन खपांन भुजांन अजांन, जुंजान जुगांन जिहांन जप्यो

महादान व्रदांन ब्रवो सनमानय, चैन सदा अनुमांन चयो

प्रतपाळक बाळक रोग प्रजाळक, जोगण चाळकनेच जयो

                         देवी जोगण चाळकनेच जयो। 14।

परजेस रमेस महेस प्रमेसज, सेस खगेस गुणेस सजै

अरधेस रिखेस रटै घट ओघट, भेस दधेस हमेस भजै

नर देस नरेस नमामि करै, नित केसव ज्यंू प्रणमेस कियो

प्रतपाळक बाळक रोग प्रजाळक, जोगण चाळकनेच जयो

                         देवी जोगण चाळकनेच जयो। 15।

छप्पय

रांमत चाळकनेच, जका गति लखी न जावै

इन्द्र करत आदेस, परम गति लखी न पावै

सेस निंवावत सीस, धिनो ब्रद तूझ सगती

आई आद अनाद, पुरख पुराण प्रकत्ती

सुर असुर पार पावै नहीं, आप बड़ा छौ ईसरी

चाळक देवी चरित चवै, जयो मात जोगेसरी।